الكُبُر ما عيب

موضوع: الكُبُر ما عيب السبت أغسطس 02, 2008 8:58 pm

بسم الله الرحمن الرحيم
مداخلة صغيرة ...
ملاحظ أن هناك بعض الأعضاء درسونا في الكورسات الصيفية جزاهم الله خير ونحنا الآن ماشين على الإثنين والأربعين ( 42 سنة ) ومعترفين .. السبب شنو البخليهم يكتبو أعمار مثل ثمانية وعشرين وهكذا .. باقي السبب واحد من إثنين :
إما الناس ديل عندهم نوايا مبيتة بالزواج مرة ثانية أو الديك اقتنع وهم ما دايرين يقتنعوا بعمرهم الحقيقي ..
وياخوانا الكبر ما عيب .. خاصة مع كتاحة من الشيب ..
المهم الثقة بالنفس والإقتناع بتنصب موقع الإشراف التربوي بعد سنوات التدريس الطويلة ..
ويا صديقي ..
راح زمن الشباب وولّى ..
وانت في أحلامك تقول كلا ...
بعد شوية .. تسمع : جدّي أجيب ليك اللبريق ؟
عاد بتقول شنو ؟
آآي يا ولدي .. الله يديك العافية .. إت ولد ياتي في البنات يا ولد ...
وتصبح مصدر ازعاج للصغار بمراسيلك الكتيرة واسئلتك العديدة ..
وما بعيد تسمع بعض الشُّفع يتصايحون لبعضمهم : أجراكا أجراكا يا عبدو .. داك جدي أسه برسلنا ...!!
وهكذا سنة الحياة ..
الله يديك ويدينا العامل الصالح ويختم لنا بخاتمة السعادة أجمعين .. آمين.

بسم الله الرحمن الرحيم

نعود لمشاكسة أخوانا المتصاغرين الباحثين عن أيام النضاروالشباب وهم طبعا لا يحاولون البتة النظر في المرآة لرؤية البشرة المكرمشة والتجاعيد والترهلات وضعف البصر وتعطل المفاصل ... ياخوانا شنو الحاصل ؟!!
ويمكن مداعبة تطلعاتهم بالأبيات التالية :

الزول إن كبر قنب يمش بعصاية
والضهر انحني ساقوو هناك لعطايا
ماخد كويتين قاريين عليو كم آية
كرشو بتنبهل تشبهلي بس مخلاية
*****

ماك داير الكبر بتدور تحس بشبابك
عايش في خيال مبسوط وفاتح بابك
الواقع بقول طولت ياخي غيابك
والشابات بلفن من الطريق الجابك
*****

حليل ايامك وكتين تسوي الشكة
تمرق تتلمع والجيب ملان بالفكة
اليوم منهزم تعبان معاك الحكة
ما بتقدر تجر لو قالوا ياخوي جكة
*****

بى سنك اعترف خليك شباب في روحك
اوعـــــاك تنخدع تقعد تزيد في مسوحك
خـايفين تنخذل بالغــش تضيع لوضوحك
حركاتك تنكــشف كيفن تداوي جــروحك
*****

ويا عزيزي المتصاغر أنت في وضع حرج لا يسمح لك أن تحلم بشيء لا يمكن تحقيقه مثل الزواج بشابة صغيرة في السن .. أو أن تحلم انك ما زلت ذلك الشاب الذي لو دخل قاعة محاضرات في الجامعة تململت الشابات وغلبهن الصبر من الوجاهة بتاعتك ... ولكن انت الآن في وضع الإنحدار نحو الشيخوخة .. فلا تقاوم التيار ... إمش وأنت مذعن للقدر .. وحضّر علاج الرطوبة .. وكل فتاة تقابلها في الطريق ضعها في اللستة المشطوبة ... لأنك لو حاولت أي محاولة أنا خايف تجيك طوبة ... فبدل الخطوبة تكون كرعيك معطوبة !!
وما أجمل أن تسمع ( جدي .. أديني مية )!!
وللحديث بقية ....

موضوع: كبر العمر ماعيب الأحد أغسطس 03, 2008 11:31 pm

الاخر البطري ياخي ما تصعب الامووووور
مع خالص شكري و تقديري

أخي المشاكس .خلي الطابل مستور .. ونحن لو حاولنا نتمنى وإن كان المنى هنا If 2 . أشكر متاعبتك اللطيفة الظرفة ياإبنى . طلبكو